თბილისის საკრებულოს ეკონომიკური განვითარების, საინვესტიციო პოლიტიკის და საერთაშორისო ურთიერთობების კომისიის წევრებმა  დედაქალაქის 2019 წლის ბიუჯეტის გადამუშავებული ვარიანტი განიხილეს. კომისიის თავმჯდომარის ოთარ გრიგოლიას თქმით, 2019 წლის ბიუჯეტი 60 მილიონ ლარამდეა  გაზრდილი.

„2019 წელს ჩვენ უფრო მეტი პროექტების განხორციელებას შევძლებთ. მე ვფიქრობ, რომ ყველაზე მნიშვნელოვანია სატრანსპორტო ინფრასტრუქტურის მშენებლობა და აღდგენა, რისთვისაც ბიუჯეტში ნახევარ მილიარდ ლარამდეა გათვალისწინებული. ქალაქში განახლდება და შეიცვლება მუნიციპალური ავტოპარკი. დაგეგმილია ახალი პროექტების განხორციელება ეკონომიკური და ტურიზმის მიმართულებით. 2019 წლის ბიუჯეტი ერთის მხრივ დასაქმებასა და ინფრასტრუქტურული პროექტების განხორციელებაზე, მეორეს მხრივ კი ბიზნესის ხელშეწყობაზე იქნება ორიენტირებული,“- განაცხადა ოთარ გრიგოლიამ.

ბიუჯეტის პროექტი საკრებულოს 10 დეკემბერს დაუბრუნდა.  გადამუშავებული ვერსია პირველად ვარიანტთან შედარებით 56 მილიონი ლარით არის გაზრდილი და  927 მილიონ 631 500 ლარს შეადგენს.