თბილისის საკრებულოს სახელდებისა და სიმბოლიკის კომისიის სხდომაზე რამდენიმე უსახელო ქუჩისა და ჩიხისთვის სახელების მინიჭების საკითხი განიხილეს.

როგორც კომისიის თავმჯდომარემ თინათინ ნიბლოშვილმა განაცხადა, ამ საკითხებს საკრებულოს უახლოეს სხდომაზე დაამტკიცებენ. დღის წესრიგით გათვალისწინებული 11 საკითხის განხილვას ის მოქალაქეები ესწრებოდნენ, რომლებმაც  კომისიას შესაბამისის განცხადებით მიმართეს.

სახელდების და სიმბოლიკის კომისიამ თბილისის სამგორის, გლდანის, საბურთალოს, ვაკის და ჩუღურეთის რაიონებში მდებარე უსახელო ქუჩებისთვის სახელების მინიჭების გადაწყვეტილებას მხარი დაუჭირა.

რამდენიმე ქუჩას ისტორიულ-გეორგაფიული სახელები დაერქმევა. მათ შორის ნიკოლოზ ტიხონოვის ქუჩასთან მდებარე უსახელო ქუჩას ნატუსების სახელი მიენიჭება,  ნიკოლოზ ხუდადოვის ქუჩასთან მდებარე უსახელო ქუჩას  და მასთან არსებული ჩიხს ტყის სახელი დაერქმევა, დიდ ლილოში, ალიოშა ჯაფარიძის ქუჩასთან მდებარე უსახელო ქუჩას და მასთან არსებულ ოთხ შესახვევს ქვიშიანის სახელი ეწოდება, იოსებ ჟორდანიას ქუჩასთან მდებარე უსახელო ქუჩას კი ზამთრიანის სახელი მიენიჭება.