თბილისის საკრებულოს სახელდებისა და სიმბოლიკის კომისია დედაქალაქში უსახელო ქუჩების დამისამართების პროცესს აგრძელებს.
კომისიის თავმჯდომარის თინათინ ნიბლოშვილის ინფორმაციით, სამგორის რაიონში წურწუმიას ქუჩის მიმდებარე ტერიტორიაზე რამდენიმე უსახელო ქუჩა განვითარდა, სადაც, დაახლოებით, 50-მდე ოჯახი უმისამართოდ ცხოვრობს.

ამ ეტაპზე  ქუჩების ქსელების  მომზადების პროცესი მიმდინარეობს. საჯარო განხილვის შემდეგ კი  ქუჩების სახელდება  დაიწყება.

როგორც დეპუტატმა განაცხადა, საჯარო რეესტრის მიერ  შენობა-ნაგებობების ნუმერაცია მოკლე პერიოდში მოხდება, ხოლო დედაქალაქის მერიის შესაბამისი სამსახურები აბრებს განათავსებენ.

მისივე თქმით, აღნიშნული პროცედურების დასრულების შემდგომ, ადგილობრივ მცხოვრებლებს იმ სასიცოცხლო სერვისებით სარგებლობის საშუალება მიეცემათ, როგორიცაა: ბავშვების საბავშვო ბაღებში მიყვანა, პირადობის მოწმობებში ზუსტი მონაცემების  შეტანა, ასევე სახანძრო, სამაშველო, სასწრაფო და  საპატრულო სერვისებით სარგებლობა და სხვადასხვა ინფრასტრუქტურული პროექტების განხორციელება.