სახელდებისა და სიმბოლიკის კომისიის წარმომადგენლებმა თაბორის მთის ფერისცვალების მამათა მონასტერის წინამძღვარ მამა  იოანე (მამუკა) ცუხიშვილის განცხადების საფუძველზე,  სამონასტრო კომპლექსი დაათვალიერეს და ამ ტერიტორიის დამისამართების საკითხი განიხილეს.

მამა იოანეს განცხადებით,  ტერიტორია ამ დრომდე არაა დამისამართებული. სახელდებისა და სიმბოლიკის კომისიის თავმჯდომარე, თინათინ ნიბლოშვილი  მონასტრის წინამძღვარს  პრობლემის მოკლე ვადაში მოგვარებას დაპირდა.

„დღეს ჩვენ მამა იოანეს მოწვევით ვიმყოფებით ამ ულამაზეს  სამონასტრო კომპლექსში. სამწუხაროდ, მონასტრამდე მისასვლელი გზა ამ დრომდე არ არის სახელდებული და ქუჩად ჩამოყალიბებული, არ არსებობს ნუმერაცია და მოწესრიგებული საგზაო ინფრასტრუქტურა. ჩვენ ხვალიდან დავიწყებთ საქმისწარმოების პროცესს, ურბანული განვითარების საქალაქო სამსახურის ჩართულობით დავაპროექტებთ გზას და ამ ტერიტორიას თაბორის მთის ქუჩის I შესახვევის სახელს მივანიჭებთ, რასაც ბუნებრივია,  შესაბამისი ინფრასტრუქტურული სამუშაოები მოყვება,“- განაცხადა თინათინ ნიბლოშვილმა.

თაბორის მთის კალთაზე ფერისცვალების მონასტერი XIII-XIVსს-ში აიგო. საუკუნეების წინ აშენებული მონასტრის ნაშთები თაბორის მთაზე დღემდეა შემორჩენილი. სამონასტრო კომპლექსის აღდგენა რამდენიმე დღის წინ, საქართველოს კათოლიკოს-პატრიარქის, უწმინდესის და უნეტარესის  ილია II-ის  ინიციატივით განხორციელდა.