თბილისის საკრებულოს განათლებისა და კულტურის კომისიის თავმჯდომარემ, კახა ლაბუჩიძემ, მწერალთა სახლში რევაზ ინანიშვილის სახელობის „ერთი მოთხრობის“ კონკურსის გამარჯვებულს  ანზორ სიფრაშვილს მოთხრობისთვის ,,ქვევრი'' პრიზი გადასცა.

კახა ლაბუჩიძის თქმით, საქართველოში რეზო ინანიშვილის გვარ-სახელი იმდენად დიდია, რომ მისი სახელობის პრემია ერთ-ერთი მნიშვნელოვანი ჯილდო იქნება  როგორც დებიუტანტი, ისე ცნობილი მწერლისთვისაც.

„ჩემი ცნობიერება, ჩემი მახსოვრობა ყველა იმ თბილ სიტყვას და ამბავს ატარებს, რაზეც დიდი მწერალი, რეზო ინანიშვილი წერდა“ - განაცხადა კახა ლაბუჩიძემ.

რევაზ ინანიშვილის სახელობის ერთი მოთხრობის კონკურსში გამარჯვებულებს პრემია ყოველწლიურად, 20 დეკემბერს, რევაზ ინანიშვილის დაბადების დღეს, გადაეცემათ. მწერალს წელს 95 წელი შეუსრულდებოდა.

კონკურსი, რომლის დამაარსებელი პოეტი და ჟურნალისტი თამარ შაიშმელაშვილია,  2010 წლიდან  ლიტერატურულ ჟურნალ „ანეულთან“ არსებობს.

კონკურსი თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის თანადგომით ტარდება.