27-28 ოქტომბერს სომხეთის დედაქალაქ ერევანში გამართულ ევროპის რეგიონთა და თვითმმართველობათა კომიტეტის აღმოსავლეთ პარტნიორობის კონფერენციის (CORLEAP) მე-14 ყოველწლიური შეხვედრაში  თბილისის საკრებულოს უმრავლესობის წევრებმა ლევან აბაშიძემ და ნინო ვარდოსანიძემ    მიიღეს მონაწილეობა.  

ღონისძიების ფარგლებში, შეხვედრის მონაწილეებმა განიხილეს რეგიონში მიმდინარე დეცენტრალიზაციის პროცესები, ადგილობრივი თვითმმართველობების გაძლიერების მიმართულებები და ევროკავშირის შავი ზღვის ახალი სტრატეგიის მნიშვნელობა აღმოსავლეთ პარტნიორობის კონტექსტში.

როგორც თბილისის მუნიციპალიტეტის საკრებულოს უმრავლესობის წევრებმა განაცხადეს,  ღონისძიებაზე  განსაკუთრებული ყურადღება გამახვილდა  CORLEAP-ის 2025-2030 წლების სამოქმედო გეგმაზე, რომელიც მიზნად ისახავს ადგილობრივ და რეგიონულ ხელისუფლებათა ჩართულობის გაზრდას საერთო ევროპული პოლიტიკის ფორმირებაში.

ოფიციალური პროგრამა ერევნის მუნიციპალიტეტში ვიზიტსაც მოიცავდა, რომლის ფარგლებში მონაწილეები ადგილობრივი მმართველობის მუშაობას, ასევე ენერგოეფექტურობის პროექტების განხორციელების პრაქტიკას გაეცნენ.

ევროპის რეგიონთა და თვითმმართველობათა კომიტეტის აღმოსავლეთ პარტნიორობის კონფერენცია (CORLEAP) არის  ევროკავშირისა და აღმოსავლეთ პარტნიორობის ქვეყნების ადგილობრივი და რეგიონული ხელისუფლების პოლიტიკური ფორუმი. CORLEAP-ი ერთადერთი პლატფორმაა, რომელიც იძლევა შესაძლებლობას განიხილოს ქალაქებისა და რეგიონების წვლილი აღმოსავლეთ პარტნიორობის განვითარებაში.