თბილისის საკრებულოში ჯანმრთელობის დაცვის და სოციალურ საკითხთა კომისიის სხდომა გაიმართა, რომელსაც კომისიის თავმჯდომარე ზურაბ ჩიკვილაძე უძღვებოდა.

სხდომაზე, კომისიის წევრებმა „თბილისის მუნიციპალიტეტის ტერიტორიაზე უსახლკაროდ რეგისტრაციისა და თავშესაფრით/საცხოვრისით უზრუნველყოფის წესის დამტკიცების შესახებ“   საკრებულოს  2019 წლის 12 თებერვლის N37-14  დადგენილებაში  ცვლილების   შეტანის  შესახებ იმსჯელეს. საკითხი დეპუტატებს თბილისის მერიის ჯანდაცვისა და სოციალური მომსახურების საქალაქო სამსახურის წარმომადგენელმა გააცნო.

პროექტის თანახმად, ცვლილება შედის უსახლკარო პირად/ოჯახად რეგისტრაციისა და თავშესაფრით/საცხოვრებლით უზრუნველყოფის კრიტერიუმებში. კერძოდ, კონკრეტდება ის სუბიექტები, რომლებიც კომისიას  პირის/ოჯახის შესახებ ინფორმაციას აწვდის. ასეთებად განისაზღვრებიან  შემდეგი  დაწესებულებები: თბილისის ტერიტორიაზე რეგისტრაციის კრიტერიუმის დაკმაყოფილების შესახებ - სახელმწიფო სერვისების განვითარების სააგენტო, უძრავ ნივთზე საკუთრების უფლებასთან დაკავშირებით -  საჯარო რეესტრის ეროვნული სააგენტო, საცხოვრებელ სადგომზე ან სხვა ფართზე მართლზომიერი მფლობელობის ან უსასყიდლოდ სარგებლობის ფაქტისა და ქირის დამოუკიდებლად გადახდის შესახებ - შესაბამისი გამგეობა, საკმარისი შემოსავლების არსებობის კრიტერიუმთან დაკავშირებით კი კომისიას ინფორმაციას შემოსავლების სამსახურმა და  შესაბამისმა საბანკო დაწესებულებამ (დაწესებულებებმა) უნდა მიაწოდონ. „სამუშაოს მაძიებლად“ რეგისტრაციის კრიტერიუმის შესახებ ინფორმაციას კომისიას -სოციალური მომსახურების სააგენტო აწვდის.

პროექტის თანახმად, ცვლილება შედის  თავშესაფრით/ საცხოვრისით უზრუნველყოფისთვის განსაზღვრულ, კომისიის მიერ, უსახლკარო პირად/ოჯახად რეგისტრირებულ პირთათვის/ოჯახებისათვის ქულათა მინიჭების იმ  სისტემაში, რომლის მიხედვითაც რიგითობა განისაზღვრება.

კომისიის სხდომაზე განხილულ საკითხს საკრებულოს სხდომაზე წარსადგენად დადებითი რეკომენდაცია მიეცა.