თბილისის საკრებულოში პარტიის „ანა დოლიძე  - ხალხისთვის“ წევრი ნინო წულაძე თბილისის მუნიციპალიტეტში არსებულ საჯარო სკოლებში მოსწავლეთა კვების უზრუნველსაყოფად ინიციატივით გამოდის. ამ საკითხთან დაკავშირებით საკრებულოს წევრმა დღეს ბრიფინგი გამართა.

როგორც ნინო წულაძემ განაცხადა, დღეს დაიწყო კამპანია, რომელიც თბილისში რეგისტრირებული მოსახლეობის ხელმოწერების შეგროვებას ითვალისწინებს.

„თბილისის მუნიციპალიტეტში არსებულ საჯარო სკოლებში მოსწავლეთა კვების უზრუნველსაყოფად ვიწყებთ თბილისში რეგისტრირებული მოსახლეობის ხელმოწერების შეგროვებას. მოქალაქეთა ერთი პროცენტის ხელმოწერების საფუძველზე საკრებულო ვალდებული იქნება აღნიშნული საკითხი განიხილოს. შესაბამისად, ჩვენ გამოვიყენებთ ამ ბერკეტს და შევაგროვებთ ხელმოწერებს.  თბილისში სულ 176 საჯარო სკოლაა, შესაბამისად, შესაძლებელია მუნიციპალიტეტის ბიუჯეტიდან გამოიყოს თანხა, რომელიც მიმართული იქნება მოსწავლეებისათვის ჯანსაღი კვების უზრუნველსაყოფად. საკრებულოსა და განათლების სამინისტროს ერთობლივი კოორდინაციით კი შესაძლებელია უზრუნველვყოთ ბავშვთა კვება საჯარო სკოლებში“,  -   განაცხადა ნინო წულაძემ

როგორც დეპუტატმა აღნიშნა, ხელმოწერების შეგროვება თბილისის არაერთ ლოკაციაზე იქნება შესაძლებელი და მოსახლეობა დააფიქსირებს საკუთარ მოსაზრებას. ამის შემდეგ კი საკრებულოში ინიციატივა დარეგისტრირდება და ინფორმაცია გავრცელდება, თუ როდის იქნება აღნიშნული საკითხის განხილვის შესაძლებლობა.