თბილისის საკრებულოს თავმჯდომარე ზურაბ აბაშიძე და საკრებულოს წევრები, ისნის რაიონში, კახეთის გზატკეცილზე მდებარე ე.წ. სამგორის პარკში, დიდი ქართველი მეფის ერეკლე მეორის ძეგლის გახსნას დაესწრნენ. ძეგლი დედაქალაქის მერმა კახა კალაძემ საქართველოს პრემიერ-მინისტრთან ირაკლი კობახიძესთან ერთად გახსნა.

ღონისძიებაზე სიტყვით გამოვიდნენ თბილისის მერი კახა კალაძე, საქართველოს პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, საქართველოს კულტურის მინისტრი თიკა რუხაძე.

თბილისის მერმა მადლობა გადაუხადა პრემიერ-მინისტრს ძეგლის განთავსების ინიციატივისთვის, ასევე, კულტურის სამინისტროსა და მოქანდაკეების ჯგუფს, რომელმაც ძეგლზე იმუშავა.

ძეგლი თბილისის მერიისა და კულტურის სამინისტროს ერთობლივი ძალისხმევით დაიდგა. ნამუშევარი მოქანდაკეების ჯგუფმა ცნობილი მოქანდაკის, მერაბ მერაბიშვილის ესკიზის მიხედვით შექმნა. მონუმენტი, რომელიც ე.წ. სამგორის პარკში ერეკლე II-ის ღვაწლის უკვდავსაყოფად განთავსდა, სივრცეს დამატებით კულტურულ-ისტორიულ მნიშვნელობას ანიჭებს.

ღონისძიებას მთავრობის, პარლამენტის, მერიისა და გამგეობის წარმომადგენლები, ასევე მოქანდაკეები, არქიტექტორები და სხვა ხელოვანები ესწრებოდნენ.