თბილისის საკრებულოს სახელდებისა და სიმბოლიკის კომისიის თავმჯდომარე ნინო ვარდოსანიძე, აპოლონ ქუთათელაძის სახელობის თბილისის სახელმწიფო სამხატვრო აკადემიაში საქართველოს დამსახურებული არქიტექტორის, ხელოვნების დამსახურებული მოღვაწის, თბილისის საპატიო მოქალაქის, გიგა ბათიაშვილის გრაფიკული და ფერწერული ნამუშევრების გამოფენას ,,მეორე სიცოცხლე“ დაესწრო.

გამოფენა სამხატვრო აკადემიის ასი წლის იუბილეს ფარგლებში, UNESCO-ს მონაწილეობით, გიგა ბათიაშვილის 88 წლის დაბადების დღეზე ჩატარდა. ღონისძიებას  საქართველოს კულტურისა და ხელოვნების სფეროს წარმომადგენლები, არქიტექტორის ოჯახის წევრები და მეგობრები ესწრებოდნენ.

საკრებულოს სახელდებისა და სიმბოლიკის კომისიის თავმჯდომარემ ნინო ვარდოსანიძემ ღონისძიებაზე სიტყვით გამოსვლის დროს განაცხადა, რომ სახელდებისა და სიმბოლიკის კომისია მუდმივად ცდილობს ისეთი დამსახურებული ადამიანების ღვაწლის სათანადოდ დაფასებას, როგორიც გიგა ბათიშვილი იყო. კომისია ინიციატივით გამოდის თბილისში ერთ-ერთ ქუჩას გიგა ბათიაშვილის სახელი მიენიჭოს.

დამსწრე საზოგადოებამ  მადლობა გადაუხადა სახელდებისა და სიმბოლიკის კომისიის თავმჯდომარეს გაჟღერებული ინიციატივისთვის და პროცესში ჩართულობაზე მზადყოფნა გამოთქვა.