თბილისის საკრებულოს ჯანმრთელობის დაცვის და სოციალურ საკითხთა კომისიის თავმჯდომარე ზურაბ ჩიკვილაძე კომისიის წევრებთან, ნათია მოდებაძესთან და ლევან აბაშიძესთან, ერთად  ჩაჩავას კლინიკას ეწვია და სამედიცინო პერსონალს შეხვდა.

კლინიკის გენერალურმა დირექტორმა მარინა გელანტიამ და რეპროდუქციული ცენტრის ხელმძღვანელმა ქეთევან გოცირიძემ სტუმრებს მულტიპროფილური სამედიცინო დაწესებულების განყოფილებები  დაათვალიერებინეს,  სადაც მოქალაქეები მაღალი ხარისხის მომსახურებას იღებენ.

სამედიცინო პერსონალთან გამართულ შეხვედრაზე საუბარი მკურნალობის, დიაგნოსტიკის, ლაბორატორიული კვლევების პროცესში მაღალტექნოლოგიური აღჭურვილობის და კვალიფიცირებულ პროფესიონალთა გუნდის ეფექტიან მუშაობას შეეხო. აღინიშნა, რომ ამ კომპონენტთა თანხვედრა  მოქალაქეებს ევროპული დონის სამედიცინო მომსახურების მიღების საშუალებას აძლევს.

„ჩვენს ქვეყანაში ათწლეულების გამოცდილების მქონე მსოფლიოში აღიარებული საერთაშორისო დონის კლინიკის არსებობა, რომელიც როგორც ადგილობრივ, ასევე უცხოელ მოქალაქეებს ემსახურება,   მნიშვნელოვანი განაცხადია.

კლინიკის მთავარი პრიორიტეტი პაციენტზე ორიენტირებაა.  მაღალტექნოლოგიური სამედიცინო სერვისები კი მოქალაქეებს ევროპული დონის, ინოვაციური სამკურნალო მეთოდებით მომსახურების მიღების საშუალებას აძლევს“,  - განაცხადა ზურაბ ჩიკვილაძემ.