სოხუმის დაცემიდან 32 წელი გავიდა. საქართველოს ერთიანობისთვის ბრძოლაში დაღუპული გმირების ხსოვნას  თბილისის საკრებულოს თავმჯდომარემ, ზურაბ აბაშიძემ, საკრებულოს წევრებთან ერთად, პატივი მიაგო და მემორიალი გვირგვინით შეამკო. საკრებულოს თავმჯდომარის თქმით, 27 სექტემბერი  საქართველოს ისტორიის ტრაგიკული თარიღია და ამ ძმათამკვლელ ომს გამარჯვებული არ ჰყავს. ზურაბ აბაშიძის განცხადებით, საქართველოს ტერიტორიული მთლიანობის მშვიდობიანი გზით აღსადგენად საქართველოს ხელისუფლება ძალისხმევას არ იშურებს. 

„27 სექტემბერი - სოხუმის დაცემის დღე - საქართველოს ისტორიის ტრაგიკული თარიღია, რომელსაც ათასობით მებრძოლი და მშვიდობიანი მოქალაქე შეეწირა.  300 ათასი ადამიანი საკუთარ ქვეყანაში დევნილად იქცა. ამ ძმათამკვლელ ომს გამარჯვებული არ ჰყოლია. სწორედ ამიტომ ჩვენ ძალისხმევა არ უნდა დავიშუროთ, რომ მშვიდობიანი გზით აღვადგინოთ საქართველოს ტერიტორიული მთლიანობა და გავაგრძელოთ საერთო მიზნისკენ სწრაფვა – ვაშენოთ დამოუკიდებელი, დემოკრატიული და ძლიერი ქვეყანა, სადაც, ჩვენს ძმებთან, აფხაზ ხალხთან, ერთად გავაგრძელებთ ცხოვრებას“- განაცხადა ზურაბ აბაშიძემ.