თბილისის საკრებულოს თავმჯდომარემ, გიორგი ტყემალაძემ,  მთაწმინდის რაიონის მაჟორიტარ დეპუტატ ზურაბ აბაშიძესთან,  განათლებისა და კულტურის კომისიის თავმჯდომარე კახაბერ  ლაბუჩიძესთან და საკრებულოს დეპუტატ ირაკლი ხელაძესთან ერთად   მოსწავლე-ახალგაზრდობის ეროვნული სასახლის სარეაბილიტაციო სამუშაოები  დაათვალიერა.

როგორც საკრებულოს თავმჯდომარემ აღნიშნა,  ეროვნული სასახლის სარეაბილიტაციო სამუშაოები აქტიურად მიმდინარეობს და  შენობა-ნაგებობების და ეზოს სრული რეაბილიტაციის დასრულება 2024 წლისთვის იგეგმება.  გიორგი ტყემალაძის თქმით, სულ მალე ბავშვები და მოზარდები კიდევ უფრო კომფორტულ გარემოში გააგრძელებენ სხვადასხვა წრესა და ჯგუფში სწავლას.

ამ ეტაპზე დასრულდა  ცენტრალური შენობის ფასადის რეაბილიტაცია. მთლიანად განახლებულია ბ ბლოკი; დარჩენილია გაგრილების სისტემის მონტაჟი  და პარალელურად მიმდინარეობს ცენტრალური შენობა-ნაგებობის შიდა სივრცის სარეაბილიტაციო სამუშაოები. ასევე მიმდინარეობს სასწავლო სივრცეების სადემონტაჟო და სარემონტო სამუშაოები.

აღსანიშნავია, რომ მოსწავლე-ახალგაზრდობის ეროვნული სასახლის სარეაბილიტაციო–სარესტავრაციო სამუშაოებს  თბილისის განვითარების ფონდი პროექტ „ახალი ტფილისის“ ფარგლებში  ახორციელებს.