თბილისის საკრებულოს თავმჯდომარე გიორგი ტყემალაძე, თავმჯდომარის მოადგილეები-გიორგი ახვლედიანი,  თინათინ ნიბლოშვილი  და  თავმჯდომარის მრჩეველი მარიკა დარჩია  მთაწმინდის მწერალთა და საზოგადო მოღვაწეთა პანთეონში იმყოფებოდნენ. დეპუტატებმა დიდი ქართველი საზოგადო მოღვაწის, დიმიტრი ყიფიანის,  ხსოვნას პატივი მიაგეს და მისი საფლავი გვირგვინით შეამკეს.

გიორგი ტყემალაძემ დიმიტრი ყიფიანის დამსახურებაზე  და მის მიერ ქვეყნის წინაშე გაწეული ღვაწლის მნიშვნელობაზე ისაუბრა.

„დღეს დიდი ქართველი საზოგადო მოღვაწის, პუბლიცისტის და გულანთებული  პატრიოტის  დაბადების დღეა.  ჩვენ პატივი მივაგეთ მის ხსოვნას და იმ შეუფასებელ ღვაწლს, რომელიც მან ქვეყნის წინაშე გასწია. მისი ცხოვრება და მოწამეობრივი აღსასრული ეროვნული თვითმყოფადობის შენარჩუნებისთვის უკომპრომისო ბრძოლის, სამშობლოსთვის თავდადების მაგალითია“,  -  განაცხადა გიორგი ტყემალაძემ.

აღსანიშნავია, რომ მეცხრამეტე საუკუნის საქართველოს განვითარებაში დიმიტრი ყიფიანმა უდიდესი როლი შეასრულა. იგი აქტიურად იყო ჩართული ქვეყნის მნიშვნელოვანი პროექტების განხორციელებაში. დიმიტრი ყიფიანი 1876-1879 წლებში თბილისის პირველი არჩეული ქალაქის თავი იყო.  თბილისის საკრებულოს ისტორიული სხდომათა დარბაზი სწორედ დიმიტრი ყიფიანის სახელს ატარებს. გარდა ამისა, დედაქალაქის საკრებულოში საზოგადო და სახელმწიფო მოღვაწის, დიმიტრი ყიფიანის, სახელობის საგამოფენო სივრცე ფუნქციონირებს.